網購攻略

海外網購集運知多d

甘耐以嚟Jikmine都被誤認爲係一家集運公司或者係做代購,其實關注開我哋嘅朋友都知道,我哋係海外網購資訊分享平台,我哋希望可以教識大家點樣自己係外國買嘢,同埋分享一d著數嘅,或者最近好Hit 但香港買唔到嘅產品畀大家,作為一個分享平台,我哋會保持中立。所以我哋一直保持唔代購或者團購。

所以今日我哋嚟講解一下,集運。

近年嚟,網購真係越嚟越盛行,而且越嚟越方便。有時候有d朋友覺得香港咩都有,洗乜係外國買,網購最開頭嘅時候就唔被人睇好。不過時代在變,香港都唔係以前嘅香港,網購更加唔係以前嘅網購。呢加你想買淘寶?無問題。淘寶官方自己就有同速遞公司合作,用集運運落嚟。甘如果想係外國買嘢呢?例如日本,韓國,美國同歐洲,想買嘢要點?其實一樣有集運。只不過呢d集運公司一般都唔會同商傢合作好似淘寶甘,而係要你自己進行操作。仲有一個觀念就係香港都係購物天堂啦,已經冇關稅,甘都比其他地方貴?其實呢個觀念真係有d過時,因爲購物天堂已經唔係畀天堂裏面d人買ga la。Anyway,其實外國賣嘅嘢好多時都比香港平,你睇Jikmine平時d post就可以感受到啦。

言歸正傳,講翻集運。海外嘅集運同平時淘寶集運其實大同小異,因爲都係為咗平,所以將好多嘢集合埋一齊再一次過運翻香港,所以叫集運。具體流程就係,集運公司會提供一個外國地址畀你,你將你件貨寄到呢個外國地址,然後佢哋一次過幫你運翻嚟,而且運費會平好多。就好似你寄d嘢去你外國朋友屋企等佢哋幫你寄翻嚟,道理係一樣嘅。雖然呢個“朋友”要收錢。

集運同代購同團購嘅分別?

首先我哋要理解一下海外購物嘅相關流程:

係網站挑選心儀嘅貨品—>落單—>寄到集運—>集運幫手運返香港—>到港提貨

一般係外國買嘢都係呢幾個步驟。

跟住落嚟就講下集運,代購同團購嘅分別:

代購\代訂,顧名思義就係代買,一般你只需提供貨物嘅連接,樣貌,大細等,然後代購就會幫你落單,當然佢哋會根據一定規則收取相應酬勞。然後你就等收貨即可。

團購,往往就針對某個網站或者某種商品,進行集體購買,一般可以節省一d運費,不過當然要收取相應報酬。

一般代購或者團購就係你負責畀錢,然後就等收貨即可。不過其實佢哋好多時都係通過集運將件貨運返香港,只不過係你哋畀額外嘅費用等佢哋幫你做曬落單之後嘅所有步驟。

但係集運,其實係一種運輸方式。不過你用集運自己買嘢,就係代表你自己係一條龍從挑選自己心儀嘅貨物開始,到落單,寄到集運地址,最後自己係香港收貨。一個人做曬所有步驟。當然自己動手肯定就唔洗收取相應報酬啦。:)

所以其實Jikmine 就係教你點樣用集運,然後自己購買外國商品嘅一個平台,當然大家仲可以係到分享大家嘅經驗同心得。

集運同代購同團購好與壞

代購&團購嘅好處

  • 方便,唔需要自己做d咩,齋畀錢就得
  • 如果件貨出現問題,往往都係由佢哋進行溝通,唔需要自己麻煩,風險相對低
  • 可以一兩件甘買都得,唔需要為運費單擔心
  • 有部分網站需要使用當地信用卡購買,或者當地Ip 地址先可以到達網站,如AF 等,但係一般佢哋都有方法解決呢個問題

代購&團購嘅壞處

  • 價錢貴,食水深,匯率差
  • 唔可以控制即時落單,可能等佢哋落單嘅時候件貨已經賣曬,或者升咗價。有時候甚至冇落到單,但又唔同你講,隔咗幾日先話翻你知
  • 唔準時,唔知道準確時間幾時收到件貨,有時候話下個禮拜收到,點知諸多借口拖足你幾個禮拜
  • 時效長,有時候因爲好多人一齊訂,所以即使件貨翻到香港都仲要分貨
  • 安全性較差,有部分商戶要求一次過付款,走咗佬都耐佢唔何
  • 選擇少,往往佢哋都係齋做某幾個網站,或者某幾種商品
  • 有機會收到流嘢,以次充好,因爲始終都係假手于人

使用集運嘅好處

  • 想買就買,唔需要等人,隨時落Order
  • 明碼實價,幾多就幾多,唔洗擔心畀人呃,或者買到流嘢
  • 自己控制時間,中意幾時運翻香港,幾時去攞都得
  • 完全享受所有優惠,如信用卡積分、網站優惠等
  • 部分網站唔支持直運香港,必須寄往海外地址
  • 運費相比起直運運費低相當之多

使用集運嘅壞處

  • 所有流程需要自己處理,需要一定時間
  • 如果貨物出現任何問題,需要自己承擔同處理,例如貨物有瑕疵,發錯貨,或者集運整唔見咗件貨,都需要自己一力承擔
  • 部分海外網站,唔接受香港信用卡付款,或者係集運地址作為收貨地址,如AF、Hollister、Coach等
  • 有部分海外網站需要購物到一定金額先免美國境内運費,冇人同你分擔

 

其實最後分享下Jikmine嘅個人意見啦,究竟係用代購好,定係用集運自己買好?經過我哋個剖析,大家都肯定有自己嘅選擇。不過Jikmine 就一向傾向於自己用集運買。主要因爲有時候係外國買嘢就係為咗慳多d,買得比香港平。但係好多時代購嘅收費就真係貴得有d離譜,分分鐘同直接係香港買差唔多價錢,而且仲要等。團購選擇又少,而且收貨嘅周期又耐。雖然用集運買都有一定風險,不過起碼死,都係死係自己手上啊嘛。上述為個人心得,如果有唔同意見歡迎留言指導同交流。

Jikmine.com作爲一個海外網購資訊分享平台,我哋定期都會有d經驗嘅分享,今次分享到呢到。下期會應Fans嘅要求,分享一下究竟點點用集運嘅具體流程。多謝關注。

 

即 買
*外國網站價格變化較快,最終價格請參考網站顯示價格。
*post中港幣價格僅供參考,實際價格視即時匯率而定。

Leave a Comment